LA PUISIA VERA - DI ORAZIO MINNELLA
15.07.2015 13:35
La puisia vera,
‘nta sustanza,
ti scinni dintra l’arma ccu putenza,
ti pungi ‘i sintimenti
e la cuscienza,
ti fa ‘rrizzari ‘i carni ‘nzichitanza.
La puisia vera
havi ‘a tindenza,
di scinniri d’aricchi,
finu ‘a “stanza”,
unni li versi vannu ‘nta vilanza,
‘ntra dd’angulu ammucciatu ‘i l’incuscenza.
Poi ‘i cordi ‘i l’arma tocca
e ‘a risunanza,
li sintimenti smovi
ddà ‘n giacenza,
pigghiannu di lu cori patrunanza.
La puisia dunca
è riflittenza,
ca a lu passari dê palori accanza,
da lu riflessu,
l’armunia e l’essenza.
Orazio Minnella
